الواقع وصوره

سؤال وجيه جدا هل استطعت فهم الواقع؟

اى انسان عاقل يقدر يسال نفسه السؤال ده هل استطاع فهم الواقع المحيط بيه ؟

فهم رغباته ورغبات الاخرين - تفهم مشاعره ومشاعر الاخرين - تفهم احتياجاته واحتياجات الاخرين

هل فهمت ما اقصده ام احسست انه نوع من الفلسفة؟

من الممكن انها تكون فلسفة ومن الممكن انها تكون بداية لقصة ما او تتويجا لقصص متعددة او نهاية درامية لاحداث مؤسفة او بداية حقيقة لسعادة اتية

لسه حاسس انها فلسفة

طيب خلينا فى الطبيعى النهاردة صحيت اكلت شربت شفت التيليفزيون فتحت الكمبيوتر تابعت الاخبار كالعادة على الانترنت
ثم عاودت الكرة اكلت وشربت
حد ذكى هيطلع يسالنى مافيش شغل؟
هقوله فى اجازة مفتوحة انتظارا لاحداث سعيدة تقع بعد عدة اشهر ربما
وبالتالى يوميى ينحصر فى حاجات بسيطة اكل وشرب وتى فى ونت ببساطة مع القراءة

للاسف ليست هذه طبيعة الحياة التى اعتدت ان احياها ولكن ظروف وسوف تنتهى

حكمة اليوم؟
لا تثق ابدا بشخص وتفشي له اسرارك تأكد سوف تسمع اسرارك من شخص اخر بعدها بايام

قصة حكمة اليوم؟

المرة الجاية هنحكى عنها كتير من حكايات سمعتها من اخرين ومن وقائع حدثت معى شخصيا
امنية الغد؟

تفائل الحياة حلوة بس اللى يفهمها

عودة من جديد!!!!!!!!!!!!!

دايما اى انسان بيحس فى وقت ما بحاجة الى الكتابة الى الذهاب الى الورق وبما ان العصر وفر لينا احدث الابتكارات والاختراعات فبقى استعمال الورق امر نادر الحدوث تقريبا لان الكمبيوتر اصبح يغنى عن كل شيء .

لكن حتى مع ذلك تظل الحاجة الى الكتابة امر ملح خاصة انها صديق الانسان الاوحد وخير من يحفظ اسراره هى الورقة التى يخط عليها بكل الاسرار

مضت فترة كبيرة منذ اخر مرة كتبت فيها يومياتى ونحن فى غير حاجة لمعرفة الاسباب

لكن قررت ان اعود للكتابة واكتب رائيى اى كان الرأى صارم وحاد فهذا افضل من الصمت والوصول لحالة الانفجار

فدائما تعودت على كتابة مذكراتى ويومياتى ولا اعلم سببها ودائما اتخلص منها اول بأول لماذا ايضا فلا اعلم ولكن منذ فترة قررت الاحتفاظ بها فمن الممكن الاستعانة ببعض ماكتب بها من يضمن ذلك!!!

لقد عدت وبقوة واتمنى ان اظل هكذا قوية للاستمرار

لست أدرى؟

لماذا احسست بهذه الاحساسيس ؟
لماذا احسست فجأة بتلاشي الثقة؟

هل هى المناورات والمناقشات الواقعية التى فرضها علينا واقعنا الحاضر ام هى بداية الشك فى الوعود المنشودة؟

لست أدرى هل اظل اتسائل على الوفاء بالعهود ام انسي واخطط من جديد؟!!!!!!

لست أدرى لماذا ابتدا قلبي بالخفقان وروحى بالاهتزاز هل هو عدم اليقين؟

هل فرض علي الواقع من جديد كلمته ؟ ام كانت امالى كلها احلام ؟

لست أدرى هل كنت اقف على ارض صلباء ام يقينا كان حلما بالثبات؟

لست أدرى هل سياتى اليوم الذى يقوم هو فيه بالوفاء ام سيظل عقلى معلق بالامال؟

لست أدرى لماذا تعلقت روحى فى الهواء

لست أدرى لماذا كف فوادىء عن النداء

لست ادرى لماذا نزفت عيونى هذه الدماء؟!!!!!

غريب أمر البشر ؟وغريب أمر الانسان!!!!!
لقد اكتشفت ان نعمة الكلام التى ميز الانسان بها ماهى الا للنكبات فقط او فى اغلب الاحيان للكوارث
لان اللسان هو مصدر كل الشرور
أسال أى شخص ليه مابتكلمشي فلان؟
يقلك اصل قالى وعاد لى تكتشف أن اغلب المصائب سببها لسان البشر
خاصة السيدات !!!!!!
طبعا فيه رجال اكتر من السيدات فى فن الكلام والقيل والقال بس الغالب العام للسيدات والبنات وده لكتر وقت فراغهم
ماورهمشي الا سيرة فلانة واخبار علانة ومين اتجوز ومين طلق ومين ناوى يسيب قريب

ايه اهمية الكلام ده فى حياة كل واحدة ست هتستفيد ايه الواحدة لما تتدخل فى حياة الاخرين وتعرف وتتبع اخبارهم زى المخبر كولمبو

وتلاقى الواحدة ايه منتظرة على احر من الجمر صاحبتها ورايحة جرى تاقبلها مبتتاخرشي دقيقة بالرغم من ان لو جوزها كان عايز منها حاجة كانت اخدت ساعة مثلا
لكن مع صاحبتها طيارة بسرعة الصوت او بسرعة الضوء وايه وعشان ايه؟تلحق تعرف اخر اخبار نفيسة وجوزها
سها وخطيبها ماهو كده
دماغ فارغة ماورهاش حاجة غير سيرة الناس والبشر هتستفيد ايه كل واحدة من كده
وكله كوم واهل الزوج كوم تانى خالص مع زوجة ابنهم والحق يقال ناس ذوق ذوق الصراحة

فى الطبيعى ان اهل الزوج عامة بيغيروا على ابنهم من الزوجة اللى هتيجى وتاخده منهم وده بناء على دراسات مصدقة على مستوى الكرة الارضية ومن اغلب كلام الزوجات الكويسين وغير الكويسين عموما

تلاقى بدا بقى شغل الكلام وفن الايقاع بين الزوجين بكل الطرق ومحاولات الاستفسار بكل الاشكال عن طبيعة العلاقة المستقرة بين الزوجين وده طبعا مش للاطمئنان لا لمحاولات زيادة فرص تأليف القصص والكلام والهدم

زى مثلا اخت الزوج تسأل اخوها بحسن نية وبراءة الذئب فى عينيها <انا حسيت كده من كلامى مع مراتك انها متضايقة هو انتم زعلانين مع بعض؟>
شوف حسن النية شوف البراءة والله الملائكة نفسها مهتسأل بالحنية دى
طبعا قصدها انها عايزة تعرف انتم كويسين مع بعض ولا متخانقين ومبهدلين بعض ده هو الغرض الخفى من السؤال البريء

طيب انتى مالك يا حشرية انك تتدخلى بين واحد وزوجته مثلا انتى مالك اساسا مالكيش بيت تهتمى باموره ولا فضاء
نفسي ارسل رسالة لكل واحدة تخليها فى حالها وتبطل تخرب فى بيوت الناس التانية عشان كتر الكلام بيولد الكراهية بين الازواج وبعضهم وبين الناس وبعضهم عامة

ودمتم
سلام

اليومية الاولى

جميل ان فجاة يلاقى الانسان نفسه قادر على كتابة يومياته كانها مثلا يوميات طه حسين لان المعروف عامة ان كتابة اليوميات او التدوينات محتاجة اديب كبير زى الناس دى
ايه الفايدة اللى هتعم على الجميع لما كل واحد فى المجتمع يكتب يومياته واهوائه الشخصية فى مدونة؟!!!!!!

بس هى فى الاخر فكرة حلوة ليه؟ وده سؤال وجيه وجهته لنفسي لما حسيت ان جه اوان انى افيد البشرية واكتب يومياتى اخيرا

لان الواحد هيخرج كل اللى جواه فى الكتابة وينام بالليل مرتاح البال ماهو خلاص ماعدش فيه كتمان كل مالواحد يزهق من حاجة مثلا يروح فورا يدونها ويضايق البشرية كلها بيها مش مجرد نفسه وبس
وده شيء اعم وافضل لانها بتوسع دائرة الانتشار بدل ماتبقى زهقان لوحدك زهق الناس كلهم معاك فكرة رهيبة عن الكأبة

لحد اللحظة اللى بكتب فيها دلوقتى وانا بحاول الاقى موضوع جيد الواحد يكتب فيها طبعا المواضيع كتير جدا بتبدأ من عدم وجود مكان لركن العريبة يوميا والطواف بها فى الشارع الى ان يحن اى صاحب عريبة اخرى ويخرج ويترك مكانه الى المواضيع التافهة جدا زى ايه احسن مسلسلات رمضان اللى فات والسيت كوم

طبعا ده كله مع البحث اليومى الرسمى عن وظيفة مناسبة لطبيبة؟
هو الطبيب برده بيدور على شغل زى بقية البشر؟اكيد ده سؤال وجيه جدا
طبعا احنا اكتر ناس بندور على شغل اللى هما مين احنا الاطباء الغلابة اللى مافيششغل ليهم جامعىولا تعليمى ولا حكومى
وزى الناس اللى زيي اللى اساس عايشة بره مصر وجائها الحنين للوطن فعادت لتبدا رحلة البحث عن الوظيفة

كل يوم تكتشف ان الوظائف الكويسة خلصت من زمان والوظائف المتبقية ماهى الى فقط حفظا لماء الوجه
اللى يقلك تاخد شيفت 8 ساعات مثلا ب 25 جنيه ومعاه نسبة وفى قرارة نفسه بيضحك ويقول ابقى قابلينى لو شفت مريض
واللى يقلك تاخد شيفت 24 ساعة بس لو احتاجنك تكمل مافيش مشكلة كمل وانت وشطارتك على اساس انك مثلا شمشون او هرقل وتقدر تحيا لعدة ايام متواصلة

ولكنها ليست النهاية وسوف نبحث ونبحث يمكن نلاقى حل
والى يوم جديد عندما تبزغ الشمس